“牌”嘅由来
日期：[2009年12月30日] 版次：[RB12] 版名：[白话广州] 稿源：[南方都市报] 网友评论：条
白话字字有段古
□ 颜志图专栏
(编者按：本版好高兴噉邀请到广州著名嘅“讲古佬”颜志图老师嚟开专栏，从今日开始，颜老师将会喺每个星期三同大家见面，讲下白话入边一啲常用字嘅典故，又有古仔听，又学习到知识，我哋一於“排排坐，听古仔”嘞。)
白话入边嘅“牌”，唔单系指扁状嘅标志物，如：牌匾、牌坊、招牌、广告牌、神主牌等，仲有一个好重要嘅用法，就系称一段时期或者时间，如“前些日子”系“前牌”或者“先几牌”，“一段时间”系“一牌”，“有牌等”即系要等好耐，“嗰牌”就系指“那段时间”，而“银纸有牌你数”，即系钱好多嘅意思……讲起呢个“牌”，就同拱北楼有关嘞。
话说明清时期，广州双门底(即而家北京路)有一座高大嘅门楼，叫“拱北楼”，楼上设置咗古代嘅计时器——— 铜壶滴漏(原来系七个铜壶为一套，而家剩低五个喺五层楼广州博物馆入边陈列)，某个时辰一到，官差就将上一个时辰嘅牌攞落嚟，换咗新嘅时辰牌。因为楼高牌大，离好远都睇得到———呢个就系官方嘅报时机构，全广州嘅时间都以佢为准口架。
清乾隆年间，钱塘诗人叶道泰旅居羊城，曾著有《广州杂咏百首》，入边有一首诗系噉写口架：“珍奇多聚大新街，翡翠明珠次第排。买得玉鱼归未晚，双门才挂午时牌。”就提到咗双门底拱北楼上挂时辰牌嘅事嘞。
各位，一个时辰等于而家两个钟，你话算唔算耐呢？唔怪得广州俗语入边，用“有牌等”嚟比喻比较耐嘅时间嘞。
